سلمان فارسی کی عمر کا ذکر

بعض محققین نے سلمان فارسیؓ کی عمر کے حوالے سے مختلف آرا پیش کی ہیں۔ جن مورخین کے نزدیک کم عمر ذکر کی گئی ہے وہ تقریباً 250 سال ہے، جبکہ زیادہ کہنے والوں کا کہنا ہے کہ انہوں نے حضرت عیسیٰ علیہ السلام کا زمانہ بھی پایا۔ میرزا حسین نوری طبرسی نے اپنی کتاب نفس الرحمن فی فضائل سلمان (ص 649-650) میں صدوق رحمہ اللہ سے کتاب “اکمال الدین” کے حوالے سے نقل کیا ہے: سلمان ان لوگوں میں سے تھے جو دین کی تلاش میں دنیا کے مختلف علاقوں میں گھومتے رہے۔ وہ مختلف علما اور فقہا سے علم حاصل کرتے ،اسرار کی جستجو کرتے اور قیامِ قائم سید الاولین والآخرین حضرت محمد مصطفیٰ (صلی اللہ علیہ وآلہ وسلم) کا انتظار کرتے رہے۔ یہ سلسلہ 400 سال تک جاری رہا۔ اگر یہ فرض کیا جائے کہ انہوں نے دین کی تلاش میں 60 سے 70 سال کی عمر میں سفر شروع کیا تو ان کی عمر تقریباً 500 سال ہوتی ہے کیونکہ وہ سنہ 34 ہجری میں وفات پا گئے تھے۔ شیخ طوسی نے اپنی کتاب الغيبة میں معمرین (طویل عمر پانے والوں) کے حالات میں لکھا ہے: اصحابِ اخبار نے روایت کی ہے کہ حضرت سلمان فارسی نے حضرت عیسیٰ علیہ السلام سے ملاقات کی اور نبی اکرم صلی اللہ علیہ وآلہ وسلم کے زمانے تک زندہ رہے۔ ان کا یہ واقعہ مشہور ہے۔ حضرت عیسیٰ علیہ السلام اور نبی اکرم (صلی اللہ علیہ وآلہ وسلم) کے درمیان تقریباً 500 سال کا فاصلہ ہے۔ بعض روایات کے مطابق نبی اکرم (صلی اللہ علیہ وآلہ وسلم) نے مسلمانوں سے فرمایا: کیا تم سلمان کو اسلام کے حوالے سے کمتر سمجھتے ہو؟ حالانکہ وہ 450 سال سے بنی اسرائیل کو اللہ پر ایمان کی دعوت دے رہے تھے۔ ایک اور روایت میں نبی اکرم (صلی اللہ علیہ وآلہ وسلم) نے اپنی ازواج مطہرات سے فرمایا: سلمان میری دیکھنے والی آنکھ ہے۔ تم یہ نہ سمجھو کہ وہ عام مردوں کی طرح ہیں۔ سلمان 450 سال سے لوگوں کو اللہ تعالیٰ اور میری بعثت سے پہلے میری طرف دعوت دے رہے تھے۔ سید مرتضیٰ نے “الشافی” میں لکھا: اصحابِ اخبار نے روایت کی ہے کہ حضرت سلمان فارسی نے 350 سال عمر پائی۔ بعض نے کہا کہ وہ 400 سال سے زیادہ زندہ رہے اور بعض کا کہنا ہے کہ انہوں نے حضرت عیسیٰ علیہ السلام کا زمانہ بھی پایا۔ مجمع البحرین میں نقل ہوا ہے: کہا گیا ہے کہ سلمان فارسیؓ نے 350 سال عمر پائی جبکہ 250 سال زندہ رہنے میں تو کوئی شک نہیں۔