احکامِ ولادت

بچّہ پیدا ہونے کے بعد اگر وہ ضررسے محفوظ ہوتو اسے دھونا اور پاک صاف کرنا مستحب ہے، اسی طرح اُس کے دائیں کان میں اذان اور بائیں کان میں اقامت کہنا مستحب ہے کیونکہ یہ شیطان ِرجیم سے پناہ کا ذریعہ ہے جیسا کہ روایات میں وارد ہوا ہے اس کے علاوہ بچّے کو آبِ فرات اور خاک ِ شفا (تربتِ امام حسین) کی گھٹی دینا اور اُس کا اچھّا نام رکھنا مستحب ہے اور یہ بچّے کا باپ پر حق ہے، اس لیے کہ روایت میں ملتا ہے کہ: (سچا ترین نام وہ ہے جو اللہ کی بندگی کے معنیٰ پر مشتمل ہو اور ناموں میں سے افضل ترین نام انبیا کے نام ہیں) اور آئمہ کے اسما مبارکہ بھی انبيا کے ناموں کے ساتھ ملحق ہیں۔ نبی اکرم (صلی اللہ علیہ وآلہ) سے مروی ہے کہ آپ (صلی اللہ علیہ و آلہ) نے فرمایا: (جس کے ہاں چار بیٹے پیدا ہوں اور کسی کا نام بھی میرے نام پر نہ رکھے تو اُس نے مجھ پہ جفا کی) لیکن اگر بچّے کا نام محمد ہو تو اُس کو ابوالقاسم کنیت دینا مکروہ ہے۔ آئمہ کے دشمنوں کے نام پر بچّے کانام رکھنا بھی مکروہ ہے۔ علاوہ ازیں ساتویں دن بچّے کے بال مونڈھنا اور ان کے برابر سونا یا چاندی صدقہ کرنا مستحب ہے لیکن کہیں سے کاٹنا اور کہیں سے چھوڑ دینا مکروہ ہے۔