"حسين منی و انا من حسين" اہل سنت طرق سے

سوال:

کیا روایت "حسين منی و انا من حسين" كتب اہل سنت میں صحیح سند کے ساتھ نقل ہوئی ہے؟

جواب:

یہ حدیث رسول خدا (صلی اللہ علیہ وآلہ وسلم) کی مشہور ترین احادیث میں سے ہے کہ جو انھوں نے اپنے نواسے امام حسین (علیہ السلام) کے بارے میں ذکر کی ہے۔ اس صحیح و مشہور حدیث کو فریقین شیعہ و سنی علماء نے اپنی اپنی معتبر کتب میں نقل کیا ہے۔
یہ روایت یعلی ابن مرہ عامری کے ذریعہ سے صحیح و معتبر سند کے ساتھ اہل سنت کی معتبر کتب میں ذکر ہوئی ہے۔
اس روایت کی عبارت اور متن، معتبر سند کے ساتھ اسماعیل بخاری کے استاد ابن ابی شیبہ کی کتاب المصنف میں اس طرح ذکر ہوئی ہے:
حَدَّثَنَا عَفَّانُ، قَالَ: حَدَّثَنَا وُهَيْبٌ، عَنْ عَبْدِ اللَّهِ بْنِ عُثْمَانَ، عَنْ سَعِيدِ بْنِ أَبِي رَاشِدٍ، عَنْ يَعْلَي الْعَامِرِيِّ، أَنَّهُ خَرَجَ مَعَ رَسُولِ اللَّهِ إلَي طَعَامٍ دَعُوا لَهُ، فَإِذَا حُسَيْنٌ يَلْعَبُ مَعَ الْغِلْمَانِ فِي الطَّرِيقِ، فَاسْتقبَلَ أَمَامَ الْقَوْمِ ثُمَّ بَسَطَ يَدَهُ وَطَفِقَ الصَّبِيُّ يَفرُّ هَاهُنَا مَرَّةً وَهَاهُنَا، وَجَعَلَ رَسُولُ اللَّهِ يُضَاحِكُهُ حَتَّي أَخَذَهُ رَسُولُ اللَّهِ فَجَعَلَ إحْدَي يَدَيْهِ تَحْتَ ذَقَنِهِ وَالْأُخْرَي تَحْتَ قَفَاهُ، ثُمَّ أَقْنَعَ رَأْسَهُ رَسُولُ اللَّهِ فَوَضَعَ فَاهُ عَلَي فِيهِ، فَقَبَّلَهُ، فَقَالَ: حُسَيْنٌ مِنِّي وَأَنَا مِنْ حُسَيْنٍ، أَحَبَّ اللَّهُ مَنْ أَحَبَّ حُسَيْنًا، وَ اَبْغَضَ اللهُ مَن اَبغَضَ حُسَینا، حُسَینٌ سِبطٌ مِنَ الا سباطِ، لَعَنَ اللهُ قاتِلَهُ۔
يعلی ابن مره عامری کہتا ہے کہ میں رسول خدا (صلی اللہ علیہ و آلہ) کے ساتھ ایک دعوت پر مہمان بن کر گیا، حسین (علیہ السلام) بچوں کے ساتھ راستے میں کھیل رہے تھے، رسول خدا (صلی اللہ علیہ و آلہ) نے ان کے سامنے آکر اپنے دونوں بازوؤں کو کھول دیا، لیکن وہ بچہ (امام حسین) دوڑتےہوئے ادھر سے ادھر چلے جاتے اور رسول خدا (صلی اللہ علیہ و آلہ) ان کو ہنساتے رہے یہاں تک کہ آپ (صلی اللہ علیہ و آلہ) نے ان کو پکڑ لیا، پھر اپنے ایک ہاتھ کو ان کی ٹھوڑی کے نیچے اور دوسرے ہاتھ کو ان کی گردن کے پیچھے رکھا اور پھر ان کے سر کو اوپر کر کے اپنے منہ کو ان کے منہ پر رکھ کر بوسے دینا شروع کر دیا اور پھر فرمایا:حسین مجھ سے ہے اور میں حسین سے ہوں، خداوند اس سے محبت کرتا ہے جو حسین سے محبت کرتا ہو، اور خداوند اس سے نفرت کرتا ہے جو حسین سے نفرت کرتا ہے، حسین نواسوں میں سے ایک نواسہ ہے، اس کے قاتل پر اللہ تعالیٰ کی لعنت ہو۔[1]
حضرت رسول (صلی اللہ علیہ وآلہ وسلم) نے اپنی اس حدیث سے اپنے اور امام حسین (علیہ السلام) کے درمیان اتحاد روحی اور قلبی تعلق کو بیان فرمایا ہے۔
یہ حدیث شیعہ علماء کے ذریعہ سے اربلی نے کتاب کشف الغمہ میں اور اسی سے نقل کرتے ہوئے علامہ مجلسی نے کتاب بحار الانوار میں ذکر کیا ہے، لیکن اس حدیث کا اصل منبع وہی ترمذی کی روایت ہے کہ جس کی سند یعلی ابن مرہ پر ختم ہوتی ہے کہ اس نے اس حدیث کو رسول خدا (صلی اللہ علیہ وآلہ وسلم) سے نقل کیا ہے۔
جناب بہبودی نے لکھا ہے کہ:
اکثر علمائے اہل سنت نے اس طرح کی احادیث کی شرح و تفصیل کو جان بوجھ بیان نہیں کیا، فقط قاضی عیاض نے حدیث حسین منی و انا من حسین کی شرح کرتے ہوئے اس حدیث کے صحیح معنی کو بیان کیا ہے۔[2]

قاضی عیاض اور شرح حدیث "حسین منّی و انا من حسین"

یہ روایت رسول خدا (صلی اللہ علیہ وآلہ وسلم) کے نزدیک امام حسین سید الشہداء (علیہ السلام) کے بلند معنوی مقام و مرتبے کو بہت واضح کر کے بیان کر رہی ہے۔ مناوی نے رسول خدا کی اسی حدیث کی شرح و تفسیر کو ابوبکر محمد ابن خلف وکیع سے ایسے نقل کیا ہے:
قال القاضي كأنه بنور الوحي علم ما سيحدث بين الحسين وبين القوم فخصه بالذكر وبين أنهما كشيء واحد في وجوه المحبة وحرمة التعرض والمحاربة وأكد ذلك بقوله أحب الله من أحب حسينا فإن محبته محبة الرسول ومحبة الرسول محبة الله۔
قاضی وکیع نے کہا ہے کہ: گویا رسول خدا (صلی اللہ علیہ و آلہ) نور وحی سے دیکھ رہے تھے کہ (امام) حسین (علیہ السلام) اور امت کے درمیان کیا واقعہ رونما ہونے والا ہے، اسی وجہ سے خاص طور پر حسین (علیہ السلام) کو اس روایت میں ذکر کرتے ہوئے بیان کیا ہے کہ رسول خدا (صلی اللہ علیہ و آلہ) اور (امام) حسین (علیہ السلام)، محبت و بے حرمتی کرنے اور ان سے جنگ کرنے کے لحاظ سے دونوں ایک ہی شخص کی طرح ہیں، اور رسول خدا (صلی اللہ علیہ و آلہ) نے اسی بات کی اپنے کلام أحب الله من أحب حسينا کے ذریعہ تاکید کی ہے، کیونکہ (امام) حسین (علیہ السلام) سے محبت کرنا، رسول خدا (صلی اللہ علیہ و آلہ) سے محبت کرنا ہے اور رسول خدا (صلی اللہ علیہ و آلہ) سے محبت کرنا، خود خداوند سے محبت کرنا ہے۔[3]

اہل سنت کے علماء کا اس روایت کی سند کو صحیح قرار دینا:

1- ترمذی:
ترمذی نے اس روایت کو سند کی ابتدامیں تھوڑی تبدیلی کے ساتھ یعلی ابن مرہ سے نقل کیا ہے اور آخر میں اس روایت کی سند کو حسن (معتبر) قرار دیا ہے:
حدثنا الْحَسَنُ بن عَرَفَةَ حدثنا إسماعيل بن عَيَّاشٍ عن عبد اللَّهِ بن عُثْمَانَ بن خيثم عن سَعِيدِ بن رَاشِدٍ عن يَعْلَي بن مُرَّةَ قال قال رسول اللَّهِ صلي الله عليه وسلم حُسَيْنٌ مِنِّي وأنا من حُسَيْنٍ أَحَبَّ الله من أَحَبَّ حُسَيْنًا حُسَيْنٌ سِبْطٌ من الْأَسْبَاطِ،
قال أبو عِيسَي هذا حَدِيثٌ حَسَنٌ [4]
2- حاكم نيشاپوری:
بزرگ اہل سنت عالم، حاكم نے بھی اس روایت کی سند کو ابن ابی شیبہ سے نقل کیا ہے اور اسی سند کو صحیح کہا ہے:
حدثني محمد بن صالح بن هانئ ثنا الحسين بن الفضل البجلي ثنا عفان ثنا وهيب ثنا عبد الله بن عثمان بن خثيم عن سعيد بن أبي راشد عن يعلي العامري أنه خرج مع رسول الله صلي الله عليه وسلم إلي طعام دعوا له ... فقال حسين مني وأنا من حسين أحب الله من أحب حسينا حسين سبط من الأسباط۔
هذا حديث صحيح الإسناد ولم يخرجاه.[5]
3- احمد كنانی:
احمد ابن ابو بكر كنانی نے بھی اسی روايت کو نقل کیا ہے اور آخر میں واضح طور پر اس سند کے راویوں کو ثقہ قرار دیتے ہوئے، سند حسن کہا ہے:
حدثنا يعقوب بن حميد بن كاسب حدثنا يحيي بن سليم عن عبد الله بن عثمان بن خيثم عن سعيد بن أبي راشد أن يعلي بن مرة حدثهم أنهم خرجوا مع النبي صلي الله عليه وسلم إلي طعام دعوا له ... وقال حسين مني وأنا من حسين أحب الله من أحب حسينا حسين سبط من الأسباط۔
هذا إسناد حسن رجاله ثقات.[6]
4- ابن ابی الدنيا:
أبو بكر عبد الله ابن محمد، المعروف ابن ابی الدنيا نے بھی اس روایت کی سند کو حسن قرار دیا ہے:
حدثنا يوسف بن موسي حدثنا عبيد الله بن موسي عن مسلم بن خالد المكي عن عبد الله بن عثمان بن خثيم أخبرني سعيد بن أبي راشد عن يعلي العامري أن النبي صلي الله عليه وسلم فغر فاه الحسين فقبله ثم قال (أحب الله من أحب حسينا وحسنا سبطان من الأسباط)۔
إسناد: حسن.[7]
5- ہيثمی:
علی ابن ابو بكر ہيثمی نے بھی اسی روایت کی سند کو معتبر کہا ہے:
وعن يعلي بن مرة قال كنا مع النبي صلي الله عليه وسلم ثم قال رسول الله صلي الله عليه وسلم حسين مني وأنا منه أحب الله من أحبه الحسن والحسين سبطان من الا بساط. قلت رواه الترمذي باختصار ذكر الحسن رواه الطبراني۔
و اسناده حسن[8]
6- ابن حبان:
یہ روایت کتاب صحیح ابن حبان میں بھی ذکر ہوئی ہے اور یہ اس بات کی علامت ہے کہ یہ روایت ابن حبان کی نظر میں صحیح ہے:
ذكر إثبات محبة الله جل وعلا لمحبي الحسين بن علي:
أَخْبَرَنَا الْحَسَنُ بْنُ سُفْيَانَ حَدَّثَنَا أَبُو بَكْرِ بْنُ أَبِي شَيْبَةَ حَدَّثَنَا عَفَّانُ حَدَّثَنَا وُهَيْبُ بْنُ خَالِدٍ عَنْ عَبْدِ اللَّهِ بْنِ عُثْمَانَ بْنِ خُثَيْمٍ عَنْ سَعِيدِ بْنِ أَبِي رَاشِدٍ عَنْ يَعْلَي الْعَامِرِيِّ أَنَّهُ خَرَجَ مَعَ رَسُولِ اللَّهِ صلي الله عليه وسلم اِلَي طَعَامٍ دُعُوا ... وَقَالَ حُسَيْنٌ مِنِّي وَأَنَا مِنْ حُسَيْنٍ أَحَبَّ اللَّهُ مَنْ أَحَبَّ حُسَيْنًا حُسَيْنٌ سِبْطٌ مِنَ الأَسْبَاطِ۔[9]
7- البانی:
بخاری زمان وہابی عالم البانی نے بھی اس روایت کی سند کہ جو ترمذی سے نقل ہوئی ہے، کو حسن (معتبر) جانا ہے:
حدثنا الحسن بن عرفة حدثنا إسمعيل بن عياش عن عبد الله بن عثمان بن خثيم عن سعيد بن راشد عن يعلي بن مرة قال قال رسول الله صلي الله عليه وسلم حسين مني وأنا من حسين أحب الله من أحب حسينا حسين سبط من الأسباط قال أبو عيسي هذا حديث حسن وإنما نعرفه من حديث عبد الله بن عثمان بن خثيم وقد رواه غير واحد عن عبد الله بن عثمان بن خثيم۔
تحقيق الألباني :صحیح۔[10]
اور البانی نے اپنی ایک دوسری کتاب میں اسی سند کو صحیح کہا ہے:
[حسين مني وأنا من حسين أحب الله من أحب حسينا حسين سبط من الأسباط]۔ (صحيح)[11]
ان علماء کے علاوہ احمد ابن حنبل نے کتاب مسند احمد، بخاری نے کتاب ادب المفرد، ابن ماجہ نے کتاب سنن ابن ماجہ اور طبرانی نے کتاب المعجم الكبير میں اسی حدیث کو نقل کیا ہے۔[12]

حدیث " حسین منّی و أنا من حسین" کا معنى کیا ہے؟

بے شک امام حسین (علیہ السلام) رسول خدا (صلی اللہ علیہ وآلہ وسلم) کے فرزند اور ان کی نسل سے ہیں اور امام حسین (علیہ السلام) درخت نبوت کی ایک شاخ شمار ہوتے ہیں۔
لیکن اس کے باوجود رسول خدا (صلی اللہ علیہ وآلہ وسلم) کی مراد، میں حسین سے ہوں، کیا ہے؟
بعض نے کہا ہے کہ رسول خدا منصب رسالت پر فائز ہونے کے بعد ان حضرت کی زندگی، ان کی رسالت کی بقاء پر اور رسالت کی زندگی، خود رسول خدا کی زندگی کی بقاء پر موقوف تھی اور کیونکہ امام حسین نے رسالت محمدی کو زندہ و باقی رکھنے کے لیے اپنے گھر کے عزیز ترین افراد کو قربان کر دیا، اس سے رسالت کو ایک نئی زندگی اور بقاء مل گئی، اسی وجہ سے واقعہ کربلا کے بعد ثابت ہو گیا کہ: الاسلام محمدیُ الحدوث حسینیُ البقاء۔
اسلام رسول خدا کی وجہ سے وجود میں آیا، لیکن امام حسین کے وجود کی وجہ سے باقی رہا۔[13]
علامہ سید جعفر مرتضى عاملى نے کتاب الصحیح من السیرة میں کہا ہے کہ:
رسول خدا کا حقیقی وجود، وہی ان کا دین و شریعت ہے، اور رسول خدا کے اسی دین و شریعت کو امیر المؤمنین علی (علیہ السلام) نے اپنی جانثاری کے ذریعے سے پھیلایا اور باقی رکھا تھا اور کیونکہ امام حسین (علیہ السلام) امیر المؤمنین علی (علیہ السلام) کے ایسے بیٹے ہیں کہ جن کے خون کی وجہ سے دین و شریعت کو زندگی و بقاء ملی، پس یہی معنی ہے رسول خدا کی حدیث کا کہ:
"میں حسین سے ہوں"۔[14]
دین محمدی کو زندہ کرنے والا، یہی انقلاب کربلا تھا، خود امام حسین (علیہ السلام) نے اپنے اس مقدس قیام کے فلسفے کو بیان کرتے ہوئے فرمایا ہے کہ:
میں نے سیرت محمدی و علوی کو زندہ کرنے کے لیے اس قیام کا آغاز کیا ہے کہ میں اس قیام کے ذریعے سے تمام انسانوں کو امر بہ معروف اور برائی و منکر سے منع کر سکوں۔
امام حسین (علیہ السلام) نے روز عاشورا جنگ کے دوران فرمایا:
اِن کان دینُ مُحَمدٍ لَم یستَقِم
إلّا بِقَتلی یا سُیوفُ خُذینی
اگر دین محمد (صلی الله علیہ و آلہ) میرے قتل کے بغیر محکم و استوار نہیں ہوتا تو آؤ شمشیرو میرا جسم حاضر ہے۔
حسین منی و انا من حسین و علیّ منی و انا من علی۔
یہ ایک اصطلاح ہے کہ جب عرب یہ بیان کرنا چاہتے ہیں کہ میرے اور اس میں بہت ہی زیادہ روحی و قلبی و جسمی اتحاد و یگانگت ہے تو وہ اس طرح کی تعبیر و الفاظ کو استعمال کرتے ہیں۔ لہذا رسول خدا کی اس حدیث کے پہلے حصے کا تعلق امام حسین کے انکا نواسہ ہونے سے بالکل نہیں ہے۔
اس بات پر دلیل یہ ہے کہ علی (علیہ السلام) نے فرمایا ہے کہ:
أَنَا مُحَمَّدٌ وَ مُحَمَّدٌ أَنَا وَ أَنَا مِن مُحَمَّدٍ وَ مُحَمَّدٌ مِنّی‏.
ان دونوں احادیث کی تفسیر یہ ہے کہ:
قال (صلی اللہ علیہ وآلہ وسلم): خلقنی اللَّهُ. و أَهل بیتی من نور واحد. و خُلِقْتُ أَنا و علی من نور واحد. و فعیسى من مریم و مریمُ من عیسى و مریم و عیسى شی‏ءٌ واحدٌ و أَنَا من ابی و أَبی منِّی و أَنَا و أَبی شی‏ءٌ واحدٌ۔
یعنی ان روایات میں دو یا دو سے زیادہ افراد کے درمیان انتہائی درجے کا روحی و قلبی اتحاد ذکر کیا گیا ہے کہ جس کو عرب اپنے الفاظ کے ساتھ بیان کرتے ہیں۔

[1] مصنف ابن أبي شيبة، ج 6، ص 380
احقاق الحق، قاضی نور الله تستری، ج 11 ص 265
بحار الانوار، ج 43 ص 261
تاریخ الاسلام، ذهبی، ج 5، ص 97
صحيح الأدب المفرد للإمام البخاري محمد ناصر الدين الألباني ج 1 ص 153 باب معانقة الصبي
جمع الجوامع أو الجامع الكبير للسيوطي ج 1 ص 11731
الطبرانى المعجم الاوسط ج 22 ص 274
المستدرك على الصحيحين الحاكم النيسابوري مع الكتاب: تعليقات الذهبي في التلخيص ج 3 ص 194

[2] "حسین منی و انا من حسین"، بهبودی، در یاد نامه علامه امینی، ص 305،
بحار الانوار، ج 43 ص 261
فضائل الخمسة من الصحاح الستة، فیروز آبادی، ج 3 ص 262
خاندان وحی در احادیث اهل سنت، عبد المعطی امین قلمجی، ترجمه آئینه وند،، ص 74

[3] فيض القدير، ج 3، ص 387

[4] سنن الترمذي ج 5، ص 658

[5] المستدرك علي الصحيحين، ج 3، ص 194

[6] مصباح الزجاجة، ج1، ص22

[7] البغدادي، أبو بكر عبد الله بن محمد بن عبيد ابن أبي الدنيا، العيال، ج 1، ص 51

[8] مجمع الزوائد، الهيثمي، ج 9 ص 181

[9] صحيح ابن حبان ج 15، ص 427

[10] صحيح وضعيف سنن الترمذي ج 8 ص 275

[11] السلسلة الصحيحة - مختصرة ج 3 ص 229

[12] مسند أحمد بن حنبل، ج4، ص172
الأدب المفرد، ج1، ص133
سنن ابن ماجه، ج1، ص51
المعجم الكبير، ج3، ص33

[13] سید محمد رضا جلالى، الامام الحسین (علیہ السلام) سماته و سیرته، نشر دار المعروف، قم- شیخ باقر قریشى، حیاة الامام الحسین (علیہ السلام)، ص 94، نشر الادب، نجف الشرف، 1394 (ه ق).

[14] سید جعفر مرتضى عاملى، الصحیح من السیرة، ج 6، ص 176، نشر دار الهادى، بیروت، 1415 (ه ق).

Install Almojib App